Javdarzordagi xaloskor

Bugun amerikalik yozuvchi Jerom Selinjerning jahon klassikasiga aylangan ushbu asarini nihoyat o'qib tugatdim.

Xolden Kolfild ismli o'smit yigitning hayotidan bir parchani hikoya qiluvchi asardan o'zimga ko'plab yangiliklar oldim deb o'ylayman. Qisqa qilib aytganda, o'ziga xos asar!

Biroq ochig'ini aytishim lozimki, ushbu kitob undan kutilgan mening barcha umidlarimni to'liq oqladi deb aytolmayman. Kitob qahramoniga achindim, lekin hammasiga o'zi sababchi ekanligi tufayli uni oqlashni istamasdim.

Xolden Kolfild - tipik "heyter". U o'z muhiti ichidagi "oq qarg'a". Aslida singlisi Fibi aytganidek "hech narsani yaxshi ko'rmaydi", hamma narsadan noliydi. Atayin qilmasa-da, ishlari doimo pachava. Chunki barcha kabi, o'tish davridagi o'spirin yigit.

U javdarzordagi jarlikda turib, u yerga yaqinlashayotgan bolalarni qutqarishni istaydi, ammo uning o'zi o'sha jarlikka qulayotganini anglamaydi. Hayotda yashashdan maqsadini hali to'liq anglab yeta olmagani bois afsus-nadomat chekadi. O'zini kattalardek tutishga harakat qilsa-da, bu doimo uning zarariga ishlaydi. Axir, u hali yosh bola! 

Tan olib aytishim mumkinki, bu asarni o'qib o'tkazgan vaqtimga achinmadim. Kitob tarjimasida ba'zi juz'iy kamchiliklarni hisobga olmasa, muammo yo'q. 

Do'stimiz Xolden ta'kidlaganidek, sizga u haqida hikoya qilib berishni istamayman, chunki hikoya qilib berishim bilanoq o'sha yerdagi qahramonlarni sog'ina boshlayman...