Aqiydatut-Tahoviya sharhining talxiysi

Diyorimizda ko‘pdan buyon qo‘llab kelinayotgan va doimo faxrlanib yuradigan birgina kitobimiz kalom, balog‘at va aql ilmlari imomi, ko‘plab mashhur ta’lifotlar sohibi al­loma Taftazoniyning «Sharhi aqoidin-Nasafiya» nomli kitobidir. To‘g‘risini aytganda, ta’vilsiz, mahoratni ishga solmay turib bu kitobdan Qur’on va Sunnatga asoslangan xolis ilmiy aqiydani topa olmaymiz. Bu kitob falsafiy aqiydalarimizni o‘z ichiga olgandir. Bizning yur­timizda, shuningdek, arab yurtlaridan boshqa barcha musulmon yurtlarida ham odatda ilmi ka­lom ulamolari o‘zlarining mo‘’taziliylar va faylasuflar bilan olib borgan munozaralari va munoqashalari davomida yozgan falsafiy aqiydalari yoki turli qissa va afsonalar asosida, uning to‘g‘ri-noto‘g‘riligi tekshirilmasdan, aytuvchisining diyonati va aqiydasi surishtirilmasdan, omma tomonidan to‘qib olingan milliy aqiydalardir. Bunday narsalar aqiyda emas, xurofotdan iboratdir.    Shuning uchun ham Allohning tavfiqi va hidoyati ila Qur’on va Sunnat asosida Islom ummatining salafi solih avlodi ittifoq qilgan va ularning ortlaridan kelgan siqa – ishonchli kishilari qabul qilgan sof aqiydalarini jamlashni orzu qilib yurar edim. Lekin bunday muhim ish meningdek ilmu taqvodan hech vaqosi yo‘q odamga oson emas edi. Binobarin, «Sharhi aqiydatut Tahoviya» kitobini olib, talxiys qildim – qisqartirdim va Islom aqiydasini o‘rganuvchi shaxs uchun lozim bo‘lgan ba’zi ma’lumotlarni qo‘shdim. Alloh taolodan menga to‘g‘rilikni ilhom qilishini, qalbimni ochishini va mazkur ishimni oson qilishini, barcha ishlarimdagi tugunlarni yechi­shini, ushbuni O‘zi uchun bo‘lgan ish sifatida qabul qilishini so‘rayman. Qudrat ham, quvvat ham oliy va ulug‘ bo‘lgan Alloh bilanginadir.